रौतहट जिल्लाको गढीमाई नगरपालिकाले शनिबार शान्तिपूर्ण वातावरणमा १२औं नगर सभा सम्पन्न गरेको छ। सभामा आर्थिक वर्ष २०८२/०८३ का लागि कुल बजेट ५४ करोड ९१ लाख ७२ हजार एक सय आठ रुपैया पारित गरिएको छ।
पारित बजेटमध्ये पुँजिगत खर्चतर्फ रु १९ करोड १५ लाख ४९ हजार र चालु खर्चतर्फ रु ३५ करोड ७६ लाख २३ हजार एक सय आठ रुपैया विनियोजन गरिएको नगरपालिकाले जनाएको छ।
नगर प्रमुख श्याम प्रसाद यादवको अध्यक्षतामा सम्पन्न सभामा जिल्ला समन्वय समितिका सभापति रामअयोध्या राय यादव प्रमुख अतिथिका रूपमा सहभागी थिए। सभामा विकास, पूर्वाधार, शिक्षा, स्वास्थ्य लगायतका प्राथमिकता क्षेत्रमा बजेट केन्द्रित गरिएको जानकारी नगरपालिकाले दिएको छ।
नगर प्रमुख यादवले आगामी वर्षमा नगरका विकास योजनाहरूलाई प्रभावकारी ढंगले कार्यान्वयन गरिने प्रतिबद्धता जनाउँदै सबै जनप्रतिनिधि, कर्मचारी र नागरिकहरूलाई सहकार्यका लागि आग्रह गरे।
उक्त नगर सभामा उपनगर प्रमुख स्मिता कुमारी यादव , १ देखी ९ वडा वडाध्यक्ष , वडा सदस्य नगरपालिका कर्मचारी, सुरक्षकर्मी, नागरिक समाज, विभिन्न पार्टीका प्रतिनिधिज्यूहरु, पत्रकारको बाक्लो उपस्थित रहेको थियो ।
