राजकुमार यादव
मौलापुर नगरपालिका स्वास्थ्य शाखाको आयोजनामा एकिकृत नि: शुल्क प्रजनन रुग्णता स्वास्थ्यसम्बन्धी निशुल्क शिविर आज (बिहीबार) मौलापुर नगरपालिका–९, सोनरनियामा सम्पन्न भएको छ।
सोनरनिया स्वास्थ्य चौकीमा सञ्चालित उक्त शिविरमा नारायणी उप–क्षेत्रीय अस्पताल वीरगञ्जकी स्त्रीरोग विशेषज्ञ डा. अलका यादवले स्तन क्यान्सर, पाठेघरको मुखको क्यान्सर, आङ खस्ने समस्या र बाझोपन सम्बन्धी स्वास्थ्य परीक्षण तथा उपचार सेवा प्रदान गर्नुभयो।
शिविरको अध्यक्षता मौलापुर नगरपालिकाकी नगर प्रमुख रीना कुमारी साहले गर्नुभएको थियो भने स्वास्थ्य संयोजक अच्छेलाल साहको विशेष उपस्थिति रहेको थियो।
शिविरमा स्थानिय महिलाहरुको उल्लेखनीय उपस्थिति रहेको थियो। पतौरा प्राथमिक स्वास्थ्य केन्द्रका डा. धिरेन्द्र यादव, सोनरनिया स्वास्थ्य चौकीका स्वास्थ्यकर्मी तथा पीएचसीका १० जना स्वास्थ्यकर्मी सहितको टोलीले स्वास्थ्य सेवा प्रदान गरेका थिए।
स्वास्थ्य शिविरमा उपनगर प्रमुख नागेन्द्र यादव, निमित्त प्रमुख प्रशासकीय अधिकृत रामबाबु साह, वडा नं. ९ का वडाध्यक्ष श्याम कुमार साह, वडा नं. ७ का वडाध्यक्ष रामपुकार साह लगायत स्थानीय जनप्रतिनिधि र नागरिकको उल्लेखनीय सहभागिता रहेको थियो।
