शिक्षा, विज्ञान तथा प्रविधि मन्त्रालयले आन्दोलनरत शिक्षकहरूलाई वार्तामा बोलाएको छ । बिहीबार जारी विज्ञप्तिमा मन्त्रालयले शिक्षक समुदायसँग छलफल गर्न सरकार सधैँ तयार रहेको जनाएको छ ।
विद्यालय शिक्षा ऐनको माग गर्दै शिक्षकहरूले काठमाडौंमा प्रदर्शन जारी राखेका छन्। माग सम्बोधन नभएको भन्दै उनीहरू सडक आन्दोलनमा उत्रिएका हुन् । आन्दोलन शान्तिपूर्ण बनाउन ८ सय स्वयंसेवक परिचालन गरिएको भए पनि ट्राफिक व्यवस्थापन प्रभावित भएको छ ।
शिक्षकहरूले ऐन जारी गर्न माग गरे पनि संसदको हिउँदे अधिवेशन अन्त्य भइसकेकोले तत्काल सम्भव छैन । उनीहरूले अध्यादेशमार्फत ऐन जारी गर्नुपर्ने बताएका छन्, तर संसदीय समितिले असहमति जनाएको छ ।
आन्दोलनको क्रममा राष्ट्रिय स्वतन्त्र पार्टीका (रास्वपा) का नेता पनि पक्राउ परेका छन्।
काठमाडौंको तीनकुनेमा राजावादीहरुले गरेको प्रदर्शनका क्रममा आपराधिक गतिविधि गरेको आरोपमा राष्ट्रिय स्वतन्त्र पार्टीका एक नेता पक्राउ परेका हुन्।
रास्वपाको निर्वाचन क्षेत्र समिति खोटाङका संयोजक समेत रहेका डाक्टर राजकुमार राई राप्रपाका नेताहरुसँग पक्राउ परेका हुन् । प्रहरीले उनको गतिविधिलाई सिसी टिभीमा हेरेर पक्राउ गरेको हो।
उनीमाथि भाटभटेनीमा भएको लुटपाटमा रक्सी चोरेकोसमेत अभियोग लगाइएको छ। उनी यसअघि खोटाङमा नेपाली कांग्रेसका नेता थिए। पछि उनी रास्वपाको सक्रिय राजनीतिमा फर्किएका थिए। अमेरिकाबाट पिएचडी गरेका राई सिसिआरसी कलेजका निर्देशकसमेत रहेको बताइएको छ।
दुई जनाको ज्यान गएको प्रदर्शनमा प्रहरीले पक्राउ गरेका मध्ये ४१ जनालाई म्याद थप गरेर अनुसन्धान अगाडि बढाएपछि उनी पक्राउ परेको पत्ता लागेको थियो। खोटाङ रावाबेसी गाउँपालिका–१ घर भएका राईलाई थुनामा राखेर अनुसन्धान गर्न प्रहरीले अनुमति लिइसकेको छ।
पहिलो पटक उनलाई ५ दिन र दोस्रो पटक ६ दिनको समय लिएर थुनामा राखेर अनुसन्धान गर्न प्रहरीले काठमाडौँ जिल्ला अदालतबाट अनुमति पाएको छ।
गएको पुस १३ गते राई खोटाङको जिल्ला अध्यक्षमा पराजित भएका थिए। केन्द्रीय सदस्य तोसिमा कार्कीको उपस्थितिमा पुस १३ गते शनिबार दिक्तेलमा भएको जिल्ला भेलामा उनी मुकुन्दकृष्ण थापासँग पराजित भएका थिए। समाचार थाहा खबरमा रहेको छ ।
गत शुक्रबार काठमाडौंको तीनकुनेमा राजावादीहरूले गरेको प्रदर्शन क्रममा भएका हिंसात्मक गतिविधिको छानबिन आवश्यक भएको छ। जति जति त्यस घटनाका सत्य, तथ्य र मिथ्या सूचना र अपूरा चित्रहरू सामुन्ने आएका छन्, तिनले न्यायिक छानबिनको मागलाई झन् झन् आवश्यक बनाएका छन्।
राजावादीहरूको प्रदर्शनमा हिंसात्मक घटना भएको झन्डै सात दिन हुन लाग्दा हामी त्यसको न्यायिक छानबिन जरूरी छ भन्ने निष्कर्षमा पुग्नुका पछाडि चार वटा मुख्य कारण छन्।
पहिलो कारण — यो प्रदर्शनमा भएका हिंसात्मक घटनाहरूमा के के भएको थियो भन्नेबारे आरोप, प्रत्यारोप र दोषारोपण जारी छ।
पत्रकार र आम मानिसले खिचेका विभिन्न भिडिओ फुटेज, प्रत्यक्षदर्शीले दिएका फरक फरक र कतिपय सन्दर्भमा बाझिने ‘बाइट’ र ब्यानले यो घटनाको प्रस्ट तस्बिर बुझ्न सहयोग गर्नुभन्दा अन्योल थप्न मद्दत गरेका छन्। त्यसमाथि काँटछाँट गरिएका र डिपफेक भिडियोसम्म प्रयोग भएको छ भन्ने दाबीले यो घटनाको यथार्थ तस्बिर झनै दुरूहपूर्ण बन्दै गएको छ।
अहिले नेपालमा मात्र होइन, संसारभरि नै समयको यस्तो दौर छ, जहाँ जिम्मेवार मिडियामा आएका भिडियो, फोटा वा अन्य सामग्रीलाई मानिसहरूले आआफ्नो रूचि र बुझाइ अनुसार ‘सत्य’ र ‘फेक (झुटो)’ भनिदिन्छन्। त्यसैले हामीलाई तीनकुनेमा भएको हिंसात्मक झडपमा के के भएको थियो भनेर सत्यतथ्य स्थापित गर्ने एउटा सर्वमान्य विधि वा प्रक्रिया चाहिएको छ।
